عذاب القبر

بسم الله الرحمن الرحيم
بعد الصلاة على النبى



حابب ابدأ أول موضوع دينى بشكل مختلف
كان طبيعى لو هاتكلم عن حاجة دينية اتكلم بالفصحى
بس حبيت اتكلم بالعامية لان الحديث الدينى ده هايكون حوار بصبغة شبابية
مش هاتكلم عن عذاب القبر وعذاب النار ولا هاقولك افعل ولا تفعل ولا هاقولك لو ماعملتش كدة تبقى فى النار ولازم تعمل كدة ..
لا
احنا هانتكلم بشكل مختلف

الاول بس حابب اتاكد من حاجة
هل انت مؤمن بيوم القيامة ولا لا؟

لو غير مؤمن بيوم القيامة يبقى الموضوع ده مش ليك ..
لو انت مؤمن بيوم القيامة وعارف ان بعد الموت فى حياة وفى بعث ومن بعد كدة خلود فى الجنة او فى النار - والعياذ بالله - يبقى ركز معايا

فلنفرض انك دخلت الجنة (قول يارب) هاتقعد قد ايه قبل ما تموت؟ خلود بلا موت
ايوة يعنى قد ايه يعنى؟ يعنى مالا نهاية

طب يا سيدى مش هاقولك مالا نهاية ولا مية مليار سنة ولا مية مليون ... هانقول انك هاتقعد فى الجنة او فى النار مية الف سنة .. بس

عارف انت حياتك كلها على بعضها قد ايه؟
بكل افراحها والامها وقسوتها ونجاحاتها وفشلها .. كل اللى انت عيشته فى حياتك وهاتعيشه .. كــــــل ده . قد ايه؟
مية سنة !!
طبعا الاعمار بيد الله وممكن حد يعمر اكثر من مئة سنة بس فى المتوسط وعموما ماحدش بيوصل للمئة سنة اصلا

طب روح بسرعة هات ورقة وقلم واحسب معايا
100 سنة فى الدنيا : 100 الف سنة فى الاخرة
انت واخد بالك من الفرق؟

يعنى لو انت مستمتع فى الدنيا بس بتعصى ربك (مئة سنة) هاتيجى فى الاخر وهاتاخد عقابك مــيـــة الــــف ســـنــة

يبقى فكر معايا
ايهما افضل؟
حط قدامك صورتين كدة وقارن بينهم
الصورة الاولى : انت بتعصى ربك ومستمتع فى الدنيا اخر استمتاع طوال مية سنة كاملة .. لكن مقابل كدة هاتدخل النار وتتعذب مية الف سنة
الصورة الثانية : انت بتطيع ربك فى الدنيا مية سنة بس .. مقابل كدة ربنا هايجازيك خير ويبسطك فى الاخرة اخر انبساط طوال مية الف سنة
خدت بالك ان المية سنة دول كلام فارغ؟ حاجة صغيرة جدا ما تذكرش (1:1000)
يا اخى تعالى على نفسك الشوية الصغيرين دول عشان تستريح بعد كدة
يعنى لو اتعرض عليك تقعد لمدة يوم وانت اغنى راجل فى العالم والناس بيعاملوك على انك الملك المتوج والحاكم بامره .. لكن مقابل كدة هاتتعذب بعدها لمدة الف يوم الناس هاتضربك فيهم واللى يشتم يشتم واللى يجيب عصاية ويضرب .. الف يوم يعنى اكتر من سنتين ونص
بلاش
لو اتقالك هاتقعد شهر اغنى واحد فى العالم وملك العالم وهاتحكم وتأمر وتنهى .. لكن بعد كدة (مش هاقولك الف شهر لا خليها مية شهر بس يعنى 8 سنين) 8 سنين هاتتعذب وتتعامل كالعبيد .... رأيك هايتغير؟
هاترضى بكدة؟
اهى دى نفس النسبة 1:1000

طيب تعالى نعمل تجربة عملية
قوم ولع البوتاجاز وغمض عينك وحط ايدك فى النار .. ثانية واحدة بس
ايه مالك؟ مانا عارف ان ايدك اتلسعت
طب تخيل ان انت كله ممكن تبقى جوة نار زى دى مش ثانية ولا الف ثانية ..لا .. الف سنة
انت كلك جوة النار دى مية الف سنة متتالية .. بس ايه . مش هاتبقى نار ضعيفة زى دى
هاتبقى اشد مية الف مرة

صعب مش كدة؟
طب تتعب نفسك ليه وتفكر انه يبقى فى احتمال يحصل كدة؟

انت لو والدك قالك تعمل حاجة هاتسمع كلامه ولا هاتقوله لا؟ فلنفرض يا سيدى انه قالك انك لو ماسمعتش الكلام هاينزل فيك ضرب وهايحبسك فى الاوضة ومش هاتخرج ولا هايأكلك لمدة يوم كامل .. حتى لو انت مش عاوز برضه هاتعمل اللى بيقولك عليه
طب لو رئيس الجمهورية قالك تعمل حاجة هاتسمع الكلام؟ طب لو قالك انك لو ماعملتش الحاجة دى هايعذبك لحد الموت انت وامك واختك واهلك كلهم وهايحبسك عشر سنين ومش هايأكلك فيهم .. حتى لو انت مش عاوز لكن برضه هاتسمع الكلام
طب يا اخى ده ربنا اللى خلق والدك وخلق رئيس الجمهورية بيقولك على حاجة وانت لو ماسمعتش كلامه هايحبسك بقى مية الف سنة وهايعذبك اشد عذاب ومش هاتاكل ولا تشرب طول 100 الف سنة لانك هاتكون متفرغ للصراخ والتألم بس .. وكل ده مش عاوز تسمع الكلام؟

طب انت لما تسمع كلام والدك من اول مرة هايعمل ايه؟ هاتلاقيه فرح بيك وجابلك هدية ولا خرجك تتفسح ولا حتى زودلك المصروف
تخيل بقى ربنا لما انت تسمع كلامه هايعمل معاك ايه؟

عاوز بقى تتخيل معايا قصورفى الجنة وخدم وحشم واستمتاع وانت ما بتعملش حاجة فى الحياة غير انك فقط تأمر وفى ناس مخلوقة خصيصا عشان يلبولك طلباتك
مانفسكش تبقى اغنى واحد فى الدنيا؟ اهو انت هاتبقى اغنى من اغنى واحد فى الدنيا مية الف مرة
يعنى لو اغنى رجل فى العالم دلوقتى معاه جنيه انت هايبقى معاك مية الف جنيه ولو هو معاه الف جنيه انت هايبقى معاك مية مليون جنيه
متخيل؟

طيب
عرفنا دلوقتى الفرق بين الصورتين
نعمل ايه عشان نبقى من اللى فى الصورة التانية ومانبقاش من اللى فى الصورة الاولى؟
الامر بسيط جدا
نسمع كلام ربنا
الامر فى البداية صعب لكن لما تبطل سجاير ولما تتحجبى شهر واحد بس هاتحسوا بالفرق
انت براحتك عاوز تفضل تشرب سجاير وعاوزة تفضلى من غير حجاب برضه ده براحتك وده شئ انا ماليش دخل فيه .. عاوز تبقى كدة براحتك .. مش عاوز برضه براحتك
انما عاوزك تعقلها
* انا لو عملت كدة -1- ابقى بعصى ربنا وهابقى من اللى فى الصورة الاولى
* انما لو عملت كدة -2- ابقى اثبتت لربنا حسن نيتى وقدمت ورق اعتمادى انى اكون من اللى فى الصورة التانية
هاتلاقى عقلك بيقولك لا يا عم وايه لزمة مية سنة متعة وراها مية الف سنة تعب؟

اسمع كلام والدك ووالدتك وربنا هايجازيك فى الدنيا وفى الاخرة .. فى الدنيا هاتلاقى ولادك سمعوا كلامك , وفى الاخرة .. عارفين طبعا , الصورة الثانية
ساعد الناس فى حياتهم عشان تلاقى ربنا بيوقفلك الناس يساعدوك
انت لو اديت عشرة جنيه مثلا لفقير هاتكون عنده بالدنيا كلها مع انها مش فارقة اوى معاك .. وهاتلاقى اللى بيساعدك بالف جنيه وهى مش فارقة معاه اوى لكن هاتفرق معاك جدا لو عاوز تعمل مشروع او تشترى حاجة او خلافه

عشان كدة ربنا خلق الناس طبقات
عشان لو انت ساعدت اللى تحتك .. اللى فوقك هايساعدك
لو ماساعدتش اللى تحتك .. اللى فوقك هايدوسك برجليه

يبقى عاوزك بقى تفضل ماشى فى الدنيا والصورتين قدامك
حصل معاك موقف معين . قبل ما ترد على الموقف ده حط الصورتين قدامك .. واسال نفسك
ايه التصرف اللى يخلينى اوصل للصورة دى وايه التصرف اللى يوصلنى للصورة التانية؟ هاتلاقى نفسك بتتصرف صح
هاتلاقى نفسك دايما بتعمل الصح .. لان ربنا مابيعملش حاجة ابدا الا ويكون فيها خير ليك . حتى لو انت اعتقدت انها فى الاول شر
يمكن ربنا مايوفقكش فى النتيجة وماتقدرش تدخل الكلية اللى انت عاوزها وتعتقد ان ده شر ليك
انما انت لو عقلتها هاتاقى انك لو كنت دخلت الكلية اللى انت حاببها كان ممكن تسقط مثلا ومستقبلك يضيع
او كان ممكن تتخرج وتتسبب لمعلومة خاطئة فى غلطة كبيرة جدا بانك تقتل مريض لو كنت دكتور او تهدم عمارة لو كنت مهندس ... الخ

يبقى اخيرا نلخص الكلام ده كله بحاجتين
1- اشكر ربنا على كل شئ وارضى بنصيبك
2- حط قدامك دايما صورتين .. مية الف سنة عذاب فى النار . ومية الف سنة نعيم فى الجنة .. وحاول تلاقى المفتاح الصح اللى يوصلك للصورة اللى انت عاوزها